Atatürk

Mustafa Kamal Atatürk 1881-ci ildə Salonikidə anadan olmuşdur.

Balaca Mustafa anasının arzusu ilə bir müddət məhəllə məktəbində oxudu. Çox keçmədən atası onu Salonikidə Şəmsi Əfəndinin müasir məktəbinə qoydu. Şəmsi Əfəndi yeni şagirdinin çox istedadlı olduğunu tez başa düşdü. Ona görə də balaca Mustafanın bu məktəbdə oxumasından son dərəcə razı idi. Mustafa bu məktəbdə oxuyarkən atası öldü.

Mustafa Şəmsi Əfəndinin ibtidai məktəbini bitirdi. Sonra bir müddət Salonikidə orta məktəbdə oxudu. Lakin ərəb dili müəllimi haqsız olaraq onu vurduğu üçün bu məktəbdən çıxdı. O, 1893-cü ildə hərbi məktəbə daxil oldu və təhsilini burada davam etdirdi. Mustafa bu məktəbi ürəkdən sevirdi. Az bir zamanda yoldaşları arasında seçildi. İstedadı və qabiliyyəti ilə müəllimlərin rəğbətini qazandı.

Məktəbin riyaziyyat müəllimi Mustafa Əfəndi zəkasına görə onu sinifdəki digər Mustafalardan fərqləndirmək istədi. Odur ki, sevimli şagirdinin adının sonuna “Kamal” sözünü əlavə etdi. Artıq gənc şagird Mustafa Kamal olmuşdu...